هاتوا التتن والعظم دنوه مني
............تكفون أبا احرق داخل الصدر هوجاس
وهاتوا معاميلي ومحماس بني
............وحطوا على جمر الغضا كيفة الراس
وهاتوا قراطيسي ترى الشعر حني
............في حندس الديجور طابت لي اوناس
من دوني السرحان جضور ووني
............أطالع القمرا وتقرع بي أجراس
أشكي على النجمات ليه اسهرني
............ويرجع علي الصوت والناس غطاس
أقلب الكفين محد ٍ فطني
............إلا إله العرش قطاف الانفاس
وخالت عيوني فوق خدي اركمني
............وغصت بي العبره وبالصدر رجّاس
لولاي اكابر كان موقي اذرفني
............وكم هي عزيزه عبرة الحر يا ناس
والله كالحشاش بالليل كني
............إلى بغى كيفه وحاله بالأفلاس
مير البلا ما هوب زمان التجني
............أثر البلا بالنفس وإبليس والناس
ودنياك لو تقرع على ظهر شني
............ دنيا دنيه باسها يالفتى باس
سود الليالي يالفتى ما اسعفني
............وحتى الصباح إن لاح شدد لي امراس
شابت عواريضي على صغر سني
............ولجّت بي العلة على سبعة أجناس
حتى الحبيب ان قلت صادق غبني
............والصاحب اللي هقوتي رافق أنجاس
وحظي تعثر يا ملا ما اسعدني
............إن قلت قام وشاش يرجع للانكاس
مير اتعزى في تراتيب فني
............يمكن تمر بعاقل ٍ ليله ادماس
يفهم علي ورد ظهر المجني
............وتلوكه الدنيا كما لوك الأضراس
يرجع خفيف العقل ملبوس جني
............وضاعت علومه بين حاسد وبلاس
لا لا تعذلوا واحد ٍ صد عني
............فرخ الدجاجه ما زهى الحر قرناس
يا ليت يدني سالف الوقت مني
............ويرجع على ما قيل تعسيف الافراس
وخز الابكار وحز راس المطني
............وسل السيوف ودن بارود الاخماس
ما فادني يا حظ كثر التمني
............ كثر التماني يرث الحظ بارجاس
حتى دروب الحب كم عثرني
............ ولا لي حظوظ ٍ عند مدقوق الالعاس
طويت أنا الأيام ليت اذكرني
............لقيتها تطوي كما طي قرطاس
والله قلبي ما طرب للمغني
............أنا طرب قلبي إلى هب نسناس
وشوف النبات وزهرها يرقصني
............وفلة حجاجي في نبا حمر الاطعاس
وصوت الخلوج بكل فج ٍ تحني
............على حوار ٍ دلّهه نبت الاطماس
وشوف القطا مع كل نقع ٍ يشني
............تسمع جليبه كنها رشفة الكاس
ولقط الزبيدي بالفلا مصدعني
............كنه نهد جادل عشر عقب الاسداس
والا القنص بالحر هو يطربني
............يبرد على كبدي ولو هي بمحماس
وخوة نشامى فعولهم يعجبني
............عز الرفيق وعز من قال نوماس
من لامني يا ناس خوذوه عني
............خله بغيظه طابخ ٍ كنه الفاس
-------------------------------------
حب ٍ سطا قلبي من أسباب ديمه
............وديمه تحسب ان الهوى ضحك ومزوح
ما الوم عيني بالبكا لو تديمه
............ولا لوم قلب ٍ من سبايبك مجروح
يا مهجتي مهجة فتاة ٍ يتيمه
............ ضاقت عليها تسهر الليل وتنوح
الله رماها عند عمه ظليمه
............تخدم ولا غيره لها فيه مصلوح
والا شجاع ٍ حكموا به غريمه
............والا كما حر ٍ ضحى اليوم مطروح
من عقب ديمه صرت مثل الهشيمه
............اصبحت جثه هامده ما بها روح
حبل الرجا والياس انقض بريمه
............ ولا لي سوى دمع ٍ على الخد مسفوح
أنا بلايه من نفوس ٍ لئيمه
............وبالحب ما طاوعت غازي وممدوح
يا نور عيني في خفا القلب شيمه
............اكمي عليها في حشايه ولا ابوح
يا كم عرض لي حب سلمى وريمه
............واغضيت كني من هوى البيض مشفوح
لك في خفوقي والضماير حشيمه
............ياللي سكنتي بالغلا داخل الروح
مالي على فرقاك صبر وعزيمه
............ارحم عشير ٍ طاح بيديك مذبوح
كم حاسد ٍ جاني بهرج النميمه
............يبي يبدل فرحة القلب بتروح
قالوا عشيرك سفهك بالشتيمه
............وسدك غدا في محضر السوق مفضوح
قلت اتركوها ما جنت بي جريمه
............ولا صك باب ٍ للغلا كان مفتوح
الله يسامحها وتبقى كريمه
............احبها تخطي وانا اقول مسموح
----------------------------------------
أبي أسفح على صدر المحبه دم شرياني
............أبي أسكب على الماضي غزير الدمع يا عيني
أبي آقف على ذكرى طوت صفحات انساني
............أبا اروي قصة الدمعه عسى العشاق توحيني
تعالوا في فلك شعري تعالوا بين ضلعاني
............عسى المعنى يساعدني عسى التعبير يمديني
بداية قصة الدمعه جرت في غبر الازماني
............بداها قيس مع ليلى واظن ختامها فيني
ألا شوفوا ترى ماتوا وصاروا طي الاكفاني
............ولا زالت محبتهم بها روح ٍ الى الحيني
غريبه قصة ٍ خلت صليب الراي حيراني
............وانا يا دمعتي جتني غرابيل ٍ تكفيني
تعبت من الزماني اللي ضحك لي ثم بكاني
............وجيتي دمعة ٍ حمرا على اثره تبكيني
نسيتي اول الايام وانا شخص ٍ ترى ثاني
............اعايش دنيتي كالناس واقوم بواجب الديني
انام الليل لا هم ٍ ولا هاجوس يغشاني
............سعيد ولا دريت الحظ يمك قام ينحيني
عرفتك والصحيح انه تغيّر كل ما كاني
............عرفتك واحسبك ضحكه تجمل صفحة سنيني
تواجهنا بلا موعد صداف بغير حسباني
............ضحكتي ضحكة ٍ صفرا حسبت انك تحبيني
بديت امسح على خدك وباحت كل اشجاني
............تعانقنا وقمتي من غدير الحب تسقيني
ألاعب شعرك بكفي واشد بكفي الثاني
............ لفيتك وارتميت بحضنك اللي قلت يدفيني
قعد اشكي عذاب الحب ليته كان عدّاني
............نسيتي ليلة ٍ وانتي على صدرك تضميني
نسيتي اليوم والماضي وليت اليوم ينساني
............وانا يا دمعتي ما انسى غرام ٍ منه تكويني
ولا انسى ولا اسلى ولا جريت الالحاني
............ لان الضحك والفرحه قضى ما عاد يعنيني
هديتك وردة ٍ حمرا ربت في روض بستاني
............اراعيها واناظرها وتشرب من شراييني
جلست سنين الاعبها بناعم كفي الحاني
............وصارت وردتي شوكه وهي في وسط يديني
خساره ارتجي دمعه نمت مع خافي احزاني
............خساره احضن بشوكه وهي بالجوف تدميني
الا كم مرني خشف ٍ من الغزلان يرجاني
............الا كم جاتني خفرا بداع الحب تدعيني
الا كم جادل ٍ طاحت وكم عذرا تمناني
............اعدد للذي يحسب هوى تسع وثمانيني
جزيت الكل بالصده وجيتك راكب حصاني
............وفي يدي شبا رمح ٍ شرب دم الحسوديني
الا يالله كم مره دعيتك مذعن ٍ حاني
............وكم مره طلبتك ساجد ٍ بين المصليني
رجيتك يا إلهي من عذاب الحب تاقاني
............ولا جاوبت لي دعوه واشوف ان واقعي شيني
وانا احمدك يا ربي على ما شان او زاني
............واحط بضامري عفوك الى نفسي تخطيني
اناظر عالمي كله من الاقصى الى الداني
............اناجي مالك الاكوان واخشع خافض جبيني
واقول الله يا ربي عرفتك بي رحماني
............تساعدني على حب ٍ يعذبني ويبريني
جعلني كاره الدنيا وابيت الليل سهراني
............تركني فاقد ٍ عقلي اداري بالمجانيني
غريب ٍ وسط خلاني وبين الربع وحداني
............حياتي كنها ساجه على الامواج تحديني
اساوم في زهر عمري وانا ادري فيه خسراني
............ارقع ثوبي البالي ترى ما عاد يكسيني
الاعب حظ يرقص له على الضيقات شيطاني
............وانا حظي فلا يفرق تساوى الشين والزيني
الا يا ناشد ٍ عني ترى ضيعت عنواني
............واظن ان قصة الدمعه بقت تالي عنوايني
ابا ارسم صورة الدمعه واسطرها بديواني
............وانادي يا حمام الدوح ليت اليوم تنعيني
تغني من على الاغصن حكايه صدق وجداني
............وتحكي قصة الدمعه على كل المحبيني
واقول القول يا ربي وانا من خلقك الفاني
............ توفق عاشق ٍ وافي وتمم قول آميني
--------------------------------------
الله من حب ٍ برا حال راعيه
............جدد مشاعر بالضماير خزنها
هاض وتحيّر في غرايب معانيه
............يسكب غزير الدمع لا من فطنها
يشكي ولا حوله رفيق ٍ يعزيه
............يدعي وغنت كل ورقا لحنها
حتى حبيبه سالي ٍ ما درى فيه
............الله عليها يوم اقفى ظعنها
ما له جدا من عضته فوق اشافيه
............جاب القلم وابيات شعره وزنها
يكتب من الخاطر معاني تعزيه
............مثل الجواهر غاليه في ثمنها
يا وين رجل ٍ ما لقى من يقديه
............يبي يطيح بحفرة ٍ ما بخنها
يبي يحقق بالمحبه امانيه
............ ويركب قحوم ٍ ما توثق رسنها
اللي ابتلى بالحب همه يكفيه
............ يا باس حاله يقصر الهرج عنها
واللي ابتدى بالحب كل ٍ يخطيه
............ما له ومال المبعده عن شطنها
ابا انشد اللي كلمة الحق ترضيه
............يفرق عشاشيق العرب من شجنها
منهم حدر مع وادي ٍ غير واديه
............يلحق عنود ٍ تطرده عن وطنها
ومنهم لقى عذرا تعزه وتغليه
............خان القدر وحظوظ غيره خذنها
ومنهم بنى قصر ٍ وطاحت مبانيه
............لمّا تهيت له غدت ما حضنها
اصبح يجر الصوت يصفق بأياديه
............ وش حيلة اللي في يدينه دفنها
ومنهم قليل ٍ جاب حظه رجاويه
............يصبح ويمسي شارب ٍ من عدنها
واللي بقى ضحك ٍتبيّن مواريه
............يومين والثالث تكشّف ضغنها
ويا الله من مزن ٍ يحل السعد فيه
............يضفي على دار ٍ وليفي سكنها
------------------------------
مابين سجّات الوفا والخيانه
............أخط شعري في سجلات الأحباب
حتى يجيه اللي عميق ٍ حزانه
............ويسكب دموع ٍ ما لها عد وحساب
يا ويل من ذاق الهوى في زمانه
............لا حاجته تقضى ولا خاطره طاب
إن جا يعبر ما تحرك لسانه
............ وإلى سكت صوّب شفاياه بالناب
وأنا على قلبي فلا لي ميانه
............إن جاه داع الحب يفتح له الباب
ما له عن الخفرات أيّة حصانه
............من وين ما هب الهوى دق الأطناب
حبي تمادى وانطلق من عنانه
............ما عدت أبالي القلب وشلون ينصاب
قلت اتصبر والصبر لي إهانه
............إن كان ما تغضي على العين الأهداب
نفسي عزيزه ما رضت بالطمانه
............عوّدتها تشرف على كل مرقاب
إن كنت محتاج ٍ فلا ابي إعانه
............خلوني أدله في غرامي وأنا شاب
وين الذي تحتاج نفسي حنانه
............وينه تركني حاير الفكر منصاب
بأيّا سبب خان العهد والأمانه
............وبأيّا سبب يقرا جوابي ولا آجاب
هو ما درى قلبي تحطّم كيانه
............يوم الرحيل وقصدهم دار الأجناب
وقّف يودعني وحرّك بنانه
............شفته يوايق لين عن ناظري غاب
دمعه تلالا يوم وقّف بيانه
............وزفرات غيظه بالحشا تلهب إلهاب
وأنا بعد حزني تعدّى مكانه
............حتى رجف من صرختي كل مشذاب
يا دار وش زينك بليا فلانه
............غير العجاج ويابس العود والداب
يا دار من عقبه عليك اللعانه
............ ولا بارك الله دار ما لي بها أحباب
خليتني يا زين مثل الرهانه
............لا أرقى على نجم ٍ ولا آطى على تراب
تقليد والتقليد ما له ضمانه
............والسوق يجمع بين صادق وكذاب
يا كيف ينسى ضحكته في ثمانه
............ وينسى الذي لأجله جفا كل الأصحاب
صار المخدر في عروقي ادمانه
............حتى التعاطي صرّحه كل الأطباب
الله يشهد ما حملت الضغانه
............أشوم للعليا بعادات الأطياب
ذقت المحبه واحسب انها فطانه
............وأثر الحمامه تطعن الحر بحراب
يا لايمي بالحب ليتك تعانه
............حتى تعرف الحب غالب وغلاب
وأنا بعد بالحب شفت المهانه
............أجر ونة نمر وذياب وعقاب
واللي سفح دمي بليا هوانه
............ظبي ٍ ترعرع بين باير والأعناب
أموت لا هز الدلع غصن بانه
............وبانت زوايا الردف من تحت الأسلاب
والخصر من دقه كما الخيزرانه
............والصدر بلور ٍ حوى آي الاعجاب
والعنق عنق الريم يا عظم شانه
............ والعين عين اللي يسموه حطّاب
والشفة الحمرا كما الديدحانه
............أو كنها جمره تحت كور شبّاب
وإلا الثنايا وردة القحويانه
............من بينهن حلو العسل راق وانذاب
مثل الفرس تمشي بهون ورزانه
............يستر مفاتنها عن الناس جلباب
لو شافها العاقل يشت اتزانه
............تقطع عبادة زاهد ٍ وسط محراب
واليوم أنا بالحب ما لي ديانه
............والظاهر أني دب الأيام مرتاب
ما هي كبر حيل ٍ ولا هي جبانه
............أمري عجيب محير ٍ كل الألباب
أعلنتها حرب ٍ شديدة طعانه
............حرب ٍ تشادي حرب بوش ٍ للإرهاب
حلفت قصر الحب أهدم اركانه
............وأسهج محله وألحق الطاب بالطاب
يا ليت ما شبيتها بإستهانه
............راحت عليه عقب تفتيل الأشناب
ما عاد حب اليوم يدفي بطانه
............ولا عاد له داعي نعدد بالأسباب
يا حظ أبو من صك قلبه وصانه
............عن الغرام وطرد تلعات الأرقاب
وإلا فانا حظي تقنطر حصانه
............ ما داس ريضان ٍ تخالف بالأعشاب
الحظ ما يجلبه فكر وذهانه
............ ولا تجلبه هرجه ولا ضرب هنداب
الصفر يبقى صفر في أي خانه
............والماي لو حرك أبد يوم ما راب
والشين يبقى شين ما شي زانه
............والموت لو يبلى فلا منه مهراب
عزي لرجال ٍ ردى الحظ هانه
............لاشك حس بثومة القلب مخلاب
الحب مثل الموت يرحم زمانه
............ يدخل قصور القلب من كل الأبواب
وإن كان راع الحب ثابت جنانه
............إن تاب راع الحب فالحب ما تاب
-----------------------------------------
[
هل الهلال وحل معه الوداعا
............وراح المدلل والمدامع دماعا
صار الصدود ولا على الأمر طاعا
............ حكم الدهر حدّه على الصاد والدال
لا وصل لا علم ٍ ولا صار مرسول
............ مع مهمه ٍ سادر على الوسع والطول
ما له مسار ولا هو العام ماهول
............عسى محله للمحل لا ولا سال
راح المدلّع وأعمس الراح والروح
............والهم طم وكسر الصدر واللوح
والأمر كله ما حصل معه مصلوح
............والراس كالمحماس ما سر له حال
الدل والمدلول والملح والكار
............والسحر والمسحور وأسرار عطار
والمسك وورود السهل هم والأعطار
............واللولو المرصوص لأحلام ما طال
لو الحلا اسم ٍ على الطرس مسطور
............صار الحلا للكل والكل مسرور
مار الحلا رسم ٍ على طارح الحور
............مرسوم كالورد الحمر للهوا مال
راع الهوى لاسم الحلا صح طمّاع
............ والطامع الأعمى إلى حِد ما راع
كم طامع ٍ رد العساكر ولا طاع
............رام العرمرم وأودع الحال ولوال
والحر لو محروم ما ركّع الراس
............رام العلا حد السما للكرم داس
لو الوطا طلّع مع الدر الألماس
............دامه علا ما ركّع الراس للمال
إلى ورد هدّم وإلى صدر دم
............ وإلى عدا عدّا وإلى سطا سم
وإلى حكم عادل وإلى سمح عم
............وإلى عطى كمّل وإلى حرم حال
وإلاّ المكارم كار ما طالها الهر
............ولا رمى سهمه لها الماكر العر
ما داسها إلا عالم ٍ حاكر ٍ حر
............إلى وعد سوّى وإلى طمح طال
والمال ما سلّم ولا طوّل أعمار
............صح الدراهم كالمراهم والأسحار
معها دوا كل العلل صار ما صار
............إلى حصل لك معمع ٍ حله المال
وطرد الهوى له سد وسلوم وحدود
............ لا طاح ما له مع هل الود محمود
كم واحد ٍ رام الهوى طاح ملهود
............صاح وحدر دمعه على الصدر همال
والعمر لو طال السعد سم حاله
............كم واحد ٍ حطه أمل ما حلاله
صاح وكسر دمعه على ما طراله
............حط الأسى مع حرد الآمال مرسال
واصحى لك الله حاسد ٍ محمل السو
............لا صار لك هده على مهلك الدو
عسى العطا لاهل العطا صار واحلو
............والله مدّه لو حِصر طم ما طال
واللوم هوم وكل أمر ٍ له أحكام
............اللوم ما سلّم ولا وصّل أرحام
مكروه ما له مدح لو صح ما لام
............ما لك وما له ما حمل معك الأحمال
وولد الردى لو هد ما طاول الحوم
............ على المطامل ماكره طاله اللوم
والحر دومه مودع الطلع ملحوم
............لا صال طال ولا أحكم الأمر ما عال
واسمع هداك الله كلام الحكاما
............الدس والمدسوس كله حراما
لا صار مكّار الملا لك ولاما
............اسلاه ما همك رماه أسود الحال
مع الملا هامل كما العود والسوس
............ومعهم معارك لو دها داسها دوس
ومعهم صعالك سو حد ٍ كما الموس
............ومعهم مسامح لو سعى الكل ما سال
والسلم له دار ومدار ومحادر
............السلم عد ٍ له وراد ومصادر
مردود لو هو صار للسو حادر
............ولا صار دحو الصل للحر مدهال
والهم أسود مار ما دام حالك
............والعسر مهما سار ما عاد سالك
ولا صلّح العطار ما صار هالك
............والحمد حمد الله على كل الأحوال
سلام عد الرمل والورد والطل
............ واعداد ما سمع الرعد والمطر هل
وطلع الهلال وعد ما طار أو حل
............على محمد والرسل وأطهر الآل
--------------------------------------------
